Palaa listaukseen

Sääʹmvuuʹdest tuäivad ânn’jõõžž kääzzkõstääʹzz põõššâm – Sääʹmǩiõl vaikktummužtuåimmorgaan nõõmtum

Lappi mäddkååʹdd valmštõõlli joʹtte sääʹmvuuʹdest vueʹssmannu looppâst da jieʹlle nuʹt čõkkpaaiʹǩin ǥu uuʹccab paaiʹǩin ouddm. Vuõccu da Nuorgam.

– Sääʹmvuuʹdest oummu liâ piâkkõõttâm tõʹst, pâʹšše-a tän poddsaž kääzzkõõzz di še tõʹst, mäʹhtt sääʹmǩiõllsiʹžže kääzzkõõzzid ǩeävv, särnn muuttâsjååʹđteei Marja Perälä.

Vuõccust saaǥǥstõʹlleš mäʹhtt kääzzkõõzzid da meärrõõzzid vuäitt jeäʹrmmsânji suåvvted pääiklaž jieʹllemnälla.

– Vuõccuneeʹǩǩ muštt’te, što tõt mii tuåimmai gåårdest ij pâi tuåim čårrpaaiʹǩin, säärnai vuässadvuõđkoordinaattor Jukka Hakola

Aanrest kuʹlleš ođđ jurddjid. Saaǥǥstõõllmõõžžin puõʹtte ouʹdde pueʹr eʹtǩǩõõzz da mäddkååʹdd tattuš veeideet kääzzkõõzzid Tâʹvvjânnamlaž õhttsažtuejjan.

– Pueʹttiääiʹj visiost sääʹmǩiõllsaž kääzzkõs-kõõskõs leʹčči-i Karasjooǥǥâst, koʹst lij juʹn spesiaalpuõccihåidd da sääʹmsiõlǥtemkõõskõs (Samisk nasjonal kompetansetjeneste SANKS) taʹrjjad sääʹmǩiõllsaž peänec- da miõltiõrvâsvuõđkääzzkõõzzid.

Visio vuäitt leeʹd vaʹǯǯâd viikkâd čõõđ lääʹjj da asetõõzzi diõtt. Vueiʹtlvaž räʹtǩǩummšen čuäʹjteš sääʹmǩiõllsaž sote-kõõskõõzz, kååʹtt âânči huõl sääʹmǩiõllsaž kääzzkõõzzi raajjmõõžžâst.

– Tõt lij miõlǩiddsaž ehdtõs. Leäʹp saaǥǥstõõllâm sääʹmǩiõllsaž kääzzkâʹsttemliinjâst. Täk liâ pueʹr ääʹveemsaaǥǥ pueʹtti saaǥǥstõõllmõõžžid, tuʹmmai sote-muuttâskoordinaattor Miia Palo.

Raajjkååʹdd haaʹlee pueʹreed raajjõhttsažtuej

Uccjooǥǥâst määŋgas haaʹlee pueʹrab raajjõhttsažtuej. Jeäʹrben Karigasnjaarg siidâst haaʹleet ââʹnned 20 ǩm kõõskâst åårrai Karasjooǥǥ kääzzkõõzzid, ǥu Uccjokkvuâllõõǥǥ tiõrvâsvuõđkääzzkõõzz liâ 100 ǩm määʹtǩest da Ruäʹvnjaarǥ kruugghospital 450 ǩm määʹtǩest.

Uccjokkneeʹǩǩ leʹjje âlddsin toođvaž ânn’jõž kääzzkõõzzid da še naʹddjõõttâm liikkeei kääzzkõõzzi vââjlažvuõđin.

– Pueʹttiääiʹjest kook-ne kääzzkõõzz vueiʹtte leeʹd aautin jååʹttemnalla da jåʹtte čårrpaaiʹǩin, smeâtt muuttâsjååʹđteei Perälä.

Raajjkåʹdden uccjokkneeʹǩǩ vueiʹtte kuäʹss-ne vuäǯǯad dåhttarvieʹǩǩ Taarr peälštemhelikopteerest. Tõt lij täujja âlddlubân Uccjooǥǥ ǥu Lääʹdd peälštemhelikopter.

Jeänõõǥǥâst valmštõõli vuåǯǯu kuullâd kååʹdd huõl staanvuõđâst da pååʹleskääzzkõõzzi uuidmõõžžâst teivvad kåʹddniiʹǩǩid di Luppodoom aassjid da tuejjlaid.

– Jeänõk haaʹlad še staaneed raajjõhttsažtuej Taarin da Ruõccin, säärnai muuttâsjååʹđteei Perälä.

Nuõri vueiʹnnlõõttmõš Jeänõõǥǥâst puuʹti ååsk valmštõõlljid. Tõn ååraš nuõr aiggu vueʹlǧǧed mätt’tõõttâd jeeʹres päikka, leša määŋgas juʹrdde pueʹtted mååusat da äʹlǧǧed põrggjen. Nuõrin lij positiivlaž pueʹttiääiʹj åskk da määŋgas seeʹst oskku põʹsttem vaikkted aaʹššid, håʹt mâka ååʹn nuõrisoovet mieʹldd.

 

Tuej juätkkje vaikktummužtuåimmorgaan mieʹldd

Sääʹmǩiõl vaikktummužtuåimmorgaan lij nõõmtum. Tuåimmorgaanâst liâ čiččâm orgaaneeʹǩǩ da väärrorgaaneeʹǩǩ nuʹt što sääʹmteeʹǧǧest liâ nellj orgaaneeʹǩǩ. Lââʹssen nõõmtummšid lij še raukkum sääʹm siidsåbbrest, sääʹmǩiõllsaž kääzzkõspuuʹtʼteeikruuggin (kååʹdd) da personorganisaatioin.

– Tuejj juätkkai jeäʹrab mieʹldd sääʹmǩiõl vaikktummužorgaan mieʹldd, ǥu noorâʹtte vuõssmõs vuâra čâhčča. Sääʹmtiiʹǧǧi saaǥǥtuõʹllj’eei Tiina Sanila-Aikio lij še Lappi kõskkäiggsaž valmštõõllâmtuåimmorgaanâst. Påʹrǧǧmannust raʹvvje mäddkåʹddvalmštõõllâm sääʹmǩiõllsaž kääzzkõõzzi valmštõõli.

Sääʹmǩiõl valmštõõllâmtuåimmorgaaʹne liâ nõõmtum pueʹtti:

Anne-Mari Näkkäläjärvi, vääras Inkeri Väystäjä

Jeänõõǥǥ kåʹdd Varpu Falck, vääras Anne Kirste Aikio

 Sääʹmteʹǧǧ Ristenrauna Magga, vääras Neeta Jääskö

Sääʹmteʹǧǧ Leena Niittyvuopio-Jämsä, vääras Nihkolas Valkeapää

Sääʹmteʹǧǧ Tiina Sanila-Aikio, vääras Pia Ruotsala-Kangasniemi

Sääʹmteʹǧǧ Risto Varis, vääras Hanna Riipi, Suäʹđjel kåʹdd Elle Aikio, vääras Laura Arola

Uccjooǥǥ kåʹdd Sääʹmǩiõllsai kääzzkõõzzi vasttõsvalmštõõlli

Õhttneei liiŋk

Ǩiõll’laž vuõiggâdvuõđ – Sote- da mäddkåʹddoođummuš – Vuʹvddoođummuš https://alueuudistus.fi/sote-uudistus/kielelliset-oikeudet Vaikktummužtuåimmorgaan nõõmtummuš, Lappi mäddkååʹdd kõskkäiggsaž valmštõõllâmtuåimmorgaan äʹššlistt 8.06.2018/Äʹššnmr 101 http://lapinliitto.tjhosting.com/cgi/DREQUEST.PHP?page=meetingitem&id=2018458-6